24. des. 2013

Nú þegar heilög jólahátíð gengur í garð, eða með öðrum orðum; „Það verður heilagt kl. 18“ eins og tengdamamma heitin orðaði það með festu. Þá erum við Sigrún sameinuð á ný. Hún er búin að vera heima síðan þann 20. des og verður fram yfir áramót á meðan það er lokað á Kristnesi. Við getum ekki hugsað okkur betri jólagjöf, en að geta verið saman yfir jólin, eftir níu langa og stranga mánuði. Það er nú kannski ekki eins farið inn í jólin og vant er. En hvað með það þótt ekki hafi verið bakað eins og Sigrún mín hefur alltaf gert eða allt jólaskraut sé ekki sett upp samkvæmt venju. Jólin koma engu að síður og við erum saman heima á ný og Sólveig og Tómas líka hjá okkur. Eitt af því sem varð að víkja fyrir þessi jólin var skrift á jólakort.

Því viljum við senda öllum gestum heimasíðunnar okkar innilegar óskir um gæfu- og gleðirík jól um leið og við þökkum af alhug alla hlýju og aðstoð þessa óvenjulegu mánuði, sem á stundum hafa verið mjög óraunverulegir. Guð blessi ykkur öll á þessari fæðingarhátíð Frelsarans. Guð veri með ykkur.