30. ágúst 2014

Nú í sumar hefur verið unnið að tímabæru viðhaldi á skilarétt sveitarfélagsins, sem staðsett er hér skammt fyrir norðan Staðarbakka. Það má segja að viðhaldi hafi verið lítið sinnt síðan fyrir HRUN, en nú var ákveðið að gera þar á bragabót.

En eins og sjá má á þessum myndum skorti nú eitthvað á smiðsaugað og yfirleitt á verksvit og hæfileika hjá þeim sem önnuðust verkið fyrir sveitarfélagið. Ég gerði alvarlega athugasemd við þetta verklag og kallaði að réttinni varaoddvitann og hann svo á oddvitann og leist þeim sem von var hörmulega á verkið. Í framhaldi af því gengu starfsmenn sveitarfélagsins í að rífa þetta aftur og smíða uppá nýtt og tókst það ágætlega. Auk  smíðanna var sett nýtt malarlag ofan í réttina og gert gott bílaplan við hana, en það var aldrei gegið almennilega frá því þegar réttin var byggð 1973. Sem sagt þetta endaði vel hvað frágang snertir, en það er meiri spurning með fjárhagshlið þessa dæmis? Hlýtur að kosta eitthvað að þurfa að vinna sama verkið tvisvar. En eftir að hafa skoðað þessi hörmungarverk mannanna við réttarsmíðina, var ágætt að geta hvarlað augunum að sköpunarverki almættisins og hugsa að varla hafi nú verið hægt að gera þessa þessa stórbrotnu fjallasýn betri.

18. ágúst 2014

Seinni sláttur hafinn í mun skárra veðri en var í hinum fyrri þetta sumarið.

17. ágúst 2014

Í dag komu þessar kempur í heimsókn: Ingvi Rafn Jóhannsson og Hreiðar Aðalsteinsson báðir ættaðir úr Hörgárdalnum, en hafa nú búið og starfað lengst af á Akureyri. Ingvi sem rafvirki en Hreiðar var vörubílsstjóri. Það kom náttúrlega ekki annað til greina en að taka lagið. Enda eru þeir félagar miklir söngmenn, hafa sungið í kórum nánast allt sitt líf og eru enn að. Fara til dæmis reglulega á öldrunarheimilin og syngja þar fyrir gamla fólkið, eins og þeir segja. Þeir syngja þar nú samt oft fyrir sér yngra fólk, enda báðir komnir vel yfir áttrætt. Það var alveg óskaplega gaman að fá þá Hreiðar og Ingva í heimsókn og auk söngsins var mikið spjallað og hlegið, enda alltaf stutt í húmorinn hjá þessum öðlingum.

Þessi hópur hljóp frá Reykjum í Hjaltadal yfir Hjatadalsheiði að Staðarbakka í dag. Alls eru þetta 28,75 km, sem tók hópinn 5:47:24 klukkustundir að hlaupa. Byrjað var í 256 m hæð á Reykjum, hæst var farið í 1.036 m á Hjaltadalsheiði og endað í 288 m á Staðarbakka.

Felix Sigurðsson sem er með á myndinni og lét mér í té myndina og upplýsingar um ferðina, komst reyndar ekki í Skagafjörðinn þannig að hann fór á móti hinum héðan frá Staðarbakka og hitti þau rétt norðan við Skólameistaravörðuna.

Sá sem stóð fyrir þessu hlaupi er lengst til hægri og heitir Stefán Gíslason umhverfisverkfræðingur úr Borgarnesi, sem flestir kannast við af pistlum hans og spjalla á Rás 1.

Hann ákvað þegar hann varð fimmtugur að hlaupa 50 fjallvegi á Íslandi fyrir sextugt og þessi ferð var númer 37.