Þá er óveðrið sem aldrei kom, afstaðið. Já, sem betur fer kom það ekki, en eftir stendur alvarleiki þess hvað veðurspár geta verið hrikalega vitlausar og það alveg fram á síðustu stundu. Í gærkveldi spáði Veðurstofa Íslands enn illviðri í nótt og fram eftir degi í dag, með stormi eða jafnvel roki og mikilli úrkomu, sem mundi falla sem snjór allt niður að sjó sumstaðar. Þetta veður kom aldrei, allavega ekki hér. Þetta var ósköp venjulegt haustveður, golugjálfur og lítilsháttar úrkoma, þannig að það gránaði aðeins í fjöll og í morgun var komin sól. Eftir stendur hvað veðurspár eru ófullkomnar og lítið á þær að treysta og það er beinlínis mjög hættulegt, að hrópa "ÚLFUR, ÚLFUR" þegar enginn "úlfur" er á ferðinni. Hvernig fer þá þegar raunverulegur "úlfur" læðist að? Þá gæti illa farið. Í illviðrinu sem gekk yfir 9. og 10. september í fyrra, varð veðrið mun verra en spáð var, einkum varð kaldara, þannig að það snjóaði meira og mun lengra niður en spár gerðu ráð fyrir. Það varð þá til þess að víða urðu miklir fjárskaðar. Núna ætluðu bændur ekki að láta slíkt endurtaka sig og víða var farið í göngur á met tíma og fé smalað af fjalli. Það er mjög dýrt einkum þar sem sláttur var mjög seint þetta sumarið og því víða lítil beit heima fyrir. Sem betur fer tókum við þá ákvörðun að smala fénu aðeins hér heim undir, en ekki alveg heim í girðingar. Það getur því notið frelsisins á fjalli enn um stund, í haust blíðunni sem spáð er næstu vikuna. Skildi sú spá rætast? Vonandi.

Flögukerlingin aðeins grásprengd eftir nóttina Mynd tekin norður Hörgárdalinn í morgun.

Sigrún komin heim í hlað. Hjartanlega velkomin heim elskan. Það er reyndar skrítin tilviljun að þessi dagur varð fyrir valinu, hann var valinn af starfskonum á Kristnesi. Það kom svo upp þegar þær voru komnar hingað, að í dag eru nákvæmlega 5 mánuðir síðan Sigrún var flutt héðan burtu í sjúkrabíl og í beinu framhaldi af því með sjúkraflugi til Reykjavíkur (27. mars). En það er liðið og nú er bara að líta björtum augum á framtíðina, þótt manni finnist bataskrefin vera stutt. En skref fyrir skref þokast allt í rétta átt og það er fyrir mestu. Eftir um þriggja tíma stopp keyrði ég svo Sigrúnu aftur í Kristnes. Hún var mjög sæl og glöð með þessa fyrstu heimkomu, þótt það væri ekkert auðvelt fyrir hana að þurfa að fara svona fljótt til baka aftur.

Hér eru þessar ágætu starfskonur af Kristnesi: Helga sjúkraþjálfi og Álfheiður iðjuþjálfi, með Sigrúnu við eldhúsborðið hennar að þiggja smá veitinga. Sigrún og Tryggur að heilsast eftir langa 5 mánuði.

Ég gisti hjá Sólveigu og Tómasi Leonard í Helgamagra í nótt. Upp úr hádeginu sótti ég svo Sigrúnu í Kristnes og við fórum í heimsókn til Jónasar og Guðrúnar. Þetta er í fyrsta skipti í nærri 5 mánuði, sem Sigrún kemur inn, annars staðar en á sjúkrastofnun. Þetta gekk ljómandi vel, enda gott að komast í íbúðina í hjólastól. Við höfðum mjög gaman af þessu enda er þetta nýr sigur fyrir Sigrúnu. Ekki skemmdi heldur um innilegar móttökur og frábærar veitingar hjá þeim hjónunum.

Í kvöld var Sigrún að vonum þreytt, en alsæl eftir ferðalag dagsins og albúin að vinna nýja sigra, með hjálp góðrar endurhæfingar á Kristnesi.

Fjallskilanefnd Hörgársveitar kom saman hér á Staðarbakka í kvöld, eins og venja hefur verið um þetta leyti árs það sem af er þessarri öld, til að raða niður fjallskilum manna og annað sem þarf að vera klárt fyrir haustið. Um hvenær skuli ganga í haust var gerð eftirfarandi bókun:

"Í Hörgársveit verða 1. göngur frá miðvikudeginum 11. til sunnudagsins 15. september, nema á Barkárdal þar verða þær sunnudaginn 22. september. Aðrar göngur eru víðast hvar um viku eftir 1. göngur."

Það láðist að taka mynd af nefndarstörfunum í kvöld, þannig að við sýnumst einum þremur árum yngri en við erum í dag.

Í dag eru liðin 16 ár síðan þessi glæsilega unga stúlka kom í heiminn, sem frumburður sinna foreldra. Innilega til hamingju með daginn Katrín okkar og megi Guð vera með þér um alla framtíð. Myndin var tekin um daginn þegar Katrín var að gramsa í dóti, sem þau eiga í geymslu í Flögu og þarna er hún búin að finna föt og töskur sem henni leist vel á að taka með sér.