21. febr. 2007

Gríma dafnar vel, hún er nú óðum að ná fyrri styrk og útliti, og er hvers manns hugljúfi hvort sem það eru heimamenn eða gestir. Hundunum heldur hún í hæfilegri fjarlægð með því að hvæsa á þá ef þeir gerast nærgöngulir, en lætur sér annars fátt um þá finnast.

20. febr. 2007

Í dag fór ég á fund í Hlíðarbæ, yfirskrift fundarins var Á að vera landbúnaður á Íslandi frummælandi var Haraldur Benediktsson formaður Bændasamtaka Íslands. Fór hann vítt yfir sviðið, þróun í búskaparháttum og bústærð, verðmyndun landbúnaðarafurða, samanburð á verði landbúnaðarafurða og annarar vöru á milli landa, samskipti Bændasamtakanna við stjórnvöld, verkalýðshreyfingu o.fl. aðila.

Í heild var þetta mjög gott erindi, sem sýndi í raun að íslenskir bændur þurfa ekki að skammast sín fyrir neitt, þeir eru að framleiða hágæða vöru á fyllilega samkeppnishæfu verði eins og gerist í nágrannalöndunum og innlendar landbúnaðarvörur eru síst dýrari í þeim samanburði en ýmsar aðrar vörur, sem búa þó ekki við það að vera framleiddar við heldur verri veðurfarsskilyrði eins og landbúnaður hér þarf að búa við.

Í kvöld var svo Dóra (Halldóra Lísbet) með kremkynningu hérna. Á henni voru auk okkar Sigrúnar, Magga, Guðleif, Sturla, Sveinfríður, Ásgerður og Dóra Margrét auk þess komu Árni Freyr og Haukur þótt þeir væru nú ekki á kynningunni. Þetta var ágætt kvöld og glatt á hjalla að vanda. Dóra bauð upp á hvítvínsstaup í lok kynningarinnar og svo gaf Sigrún öllum kaffi og meðlæti í restina.

Myndin er gömul frá fyrri kynningu hjá Dóru!

19. febr. 2007

Við Sigrún fórum til Akureyrar í dag, við fórum bæði til Hauks tannlæknis, svona í eftirlit og gekk það ágætlega. Við vorum líka að versla nauðsynjar í Bónus og fórum þar í bollukaffi. Ég var líka aðeins eð skoða með lambamerki, fór bæði í Vélaborg og Bjarg að fá sýnishorn, líst betur á merkin á Bjargi, þau eru norsk.

Í kvöld kom svo Sigló fjölskyldan óvænt í heimsókn, þau stoppuðu í eina tvo og hálfan tíma og var það gaman að fá að sjá þau aðeins.

15. febr. 2007

Smávegis slydda var í dag, annars er enginn snjór, aðeins rúmlega grá jörð. Við Sigrún erum þessa dagana að skipta um merki í þeim ærárgöngum sem ekki var skipt í í fyrra, það er ám fæddum 2002 til 2004. þetta er þó nokkuð staut við skrifum ofan í alla stafina fyrst svo lesningin sjáist betur. Ég hef líka verið að færa fangið inn í Fjárvís og er það nú allt búið. Ég er líka búinn að færa allt bókhaldið inn í dk Búbót, sem hægt er að færa en það vantar uppfærslur til að hægt sé að klára alveg.

12. febr. 2007

Í dag fór ég á stjórnarfund hjá SAH svf. á Blönduósi. Við vorum aðallega að fara yfir lög félagsins, því það stendur til að gera verulegar breytingar á þeim á aðalfundinum vor. Stærstu breytingarnar eru þær að nú er SAH ekki lengur afurðasölufyrirtæki, heldur aðallega eignavörslufyrirtæki. Félagið á verulegar húseignir á Blönduósi og það á 51 % hlut í SAH Afurðum ehf. sem er einkahlutafélag, sem annast nú alla slátrun og úrvinnslu afurðanna. Þetta kallar á breytingar á samþykktunum, svo er líka meiningin að haf  SAH svf. ekki lengur deildaskipt samvinnufélag, einnig þarf að setja inní lög félagsins hvernig farið á með það atkvæðavægi sem fylgir þessu 51 % sem SAH svf. á í SAH Afurðum ehf. og hvernig á að velja þá 3 stjórnarmenn sem SAH svf. á rétt á þar. Ýmsar fleiri smávægilegar breytingar þarf einnig að gera sem ekki verða tíundaðar hér að svo stöddu.

Áður en ég fór vestur í morgun keyrði ég Sigrúnu til Akureyrar þannig að hún gæti verið hjá mömmu sinni í Hlíð á meðan og stytt henni stundirnar. Við komum ekki heim fyrr en kl. að ganga 9 í kvöld.

8. febr. 2007

Allt gott að frétta af Grímu, hún braggast með hverjum deginum sem líður, étur fisk í öll mál og er farin að fá vöðva aftur. Mér finnst hún bara sæl og glöð í sveitinni.