Það var farið aftur í Grjótárgilið í dag. Auk okkar Stefáns fóru þeir Skriðufeðgar: Þór og Egill Már. Þór hafði með sér byssu ef ekki reyndist annar kostur en skjóta lambhrútinn niður úr sjálfheldu. Þeir þrír fóru upp nyrðri gilbarminn en ég fór inn í gilið eins og við Stefán gerðum í gær. Þegar ég var kominn inn í gilið þar sem lambhrúturinn var í gær, kom í ljós að hann var algerlega horfinn þaðan. Skömmu síðar heyrði ég í þeim félögum á nyrðri gilbrúninni í talstöðinni að þeir væru búnir að sjá hrútinn beint á móti sér í syðri brún gilsins. Var þá tekin ákvörðun um að Stefán færi inn á Grjótárdalinn, alveg inn fyrir gilið og þar yfir Grjótána, til að reyna að ná lambinu frá gilinu, en þeir feðgar biðu á meðan til að reyna að hóa svo síður væri hætta á að lambhrúturinn stingi sér aftur ofan í gilið. En allt kom þetta fyrir ekki og um leið lambhrúturinn varð Stefáns var stakk hann sér ofan í gilið, þrátt fyrir að þeir feðgar reyndu að öskra á móti honum. Þar stoppaði hann á smá klettanös, þar sem var rétt pláss fyrir hann til að standa, en undir var nokkurra tuga þverhnípt hengiflug alveg niður á botn gilsins. Nú var bara eitt í stöðunni og það var að grípa til byssunnar, gilið er þarna það mjótt að þetta var ágætis skotfæri fyrir Þór og svo er hann ágæt skytta. Þarna lauk því þessari frelsisbaráttu lambhrútsins og á mun skjótvirkari hátt heldur en hann hefði ekki náðst þarna og hans beðið að svelta í hel, þegar illviðri komandi vetrar fara að láta á sér kræla. Á myndinni eru þeir félagar Egill Már, Þór, Stefán og Tryggur að koma að dráttarvélinni eftir þessar aðgerðir. Þess má svo að endingu geta, að þetta er í fyrsta skipti í minni tíð, sem hér hefur þurft að skjóta niður kind úr sjálfheldu, þrátt fyrir margan krappan dansinn í eltingaleik við fótfráar fjallafálur. 

 Hér http://2110.123.is/photoalbums/270223/  má sjá nokkrar myndir úr Grjótárgilinu og við það í dag. Þó ekki af þeim stað þar sem hrúturinn endaði líf sitt, þar sem ég var ofan í gilinu og sá því ekki staðinn.

Í dag fórum við Gestur á hrútasýningu, vestur að Þverá í Akrahreppi. Þar voru sýndir bæði lambhrútar og veturgamlir hrútar í ýmsum flokkum. Þetta var hin ágætasta skemmtun, alltaf gaman að skoða hrúta. Á myndinni eru verðlaunahafar fyrir bestu lambhrútana með sýna kosta gripi....

og svo voru börnin með sýningu á sýnum fallegu lömbum. Hér er ráðunauturinn Eyþór Einarsson með dóttir sinni með lambið hennar.

Í dag vorum við að velja lífgimbrarnar. Tæpar 90 verða settar á vetur þetta haustið á Staðarbakka. Það var úr mörgum föngulegum gimbrum að velja. Á myndinni er Hákon bóndi og mamma hans með 10 gimbrar sem hann fékk hjá mér. Glæsilegur hópur, sem vonandi á eftir að reynast honum vel.